Conferéncias DUO – Ostal d’Occitània, Tolosa

Dimècres 4 de març de 2015 – 18:30

Joan-Pèire CAVAILLÉ (EHESS)

En Lemosin. Una seria de documentaris en occitan

Dempuèi qualquas annadas, amb l’IEO dau Lemosin, anam pel campestre e dins los borgs rodar de films documentaris corts metratges en lenga nòstra (jostitolats), amb los darrièrs locutors « naturals ». La difusion se fa sus una cadena de television locala, sus internet e dins l’encastre del festenal Llanterna Digital.

La tòca es a l’encòp de far de collectatge linguïstic « d’urgéncia », de servar una memòria orala que s’ecafa, mas tanben d’agafar de tròces de la realitat sociala e culturala del Lemosin d’uèi. Aital, filmam d’agricultors e d’artisans (panieraires, forniers, etc.) al trabalh, mas encara de monde ocupats a de praticas religiosas o terapeuticas (culte de las bonas fonts, procession de Manhac Laval…) o a transmetre la memòria del passat (primièra e segonda guèrra mondiala, l’istòria del comunisme rural, de la vida obrièra a Limòtges, dels enfants de l’assisténcia publica a la campanha, etc.).

La sesilha serà consacrada al visionatge de qualques films, seguits de temps de discussion.

Joan-Pèire Cavaillé, nascut a-z-Albi en 1959, ensenha l’antropologia istorica a l’EHESS (Tolosa) e engajat dins lo moviment occitan. Es, entre autres, lo creator e l’animator del blòg Mescladis e Còps de Gula.